2023 йилда Ўзбекистон ташқи савдо айланмасида Хитой ва Россиянинг улуши 38 фоизга етди, қўшни мамлакатларнинг улуши эса 17 фоиздан 13 фоизгача қисқарди. Йил давомида олтинсиз экспорт атиги 4,5 фоизга ўсди ва мутлақ рекорд миқдорда – 8,2 млрд долларлик олтин сотилди. Газ экспорти қарийб икки баробарга қисқарди.

2023 йилда Ўзбекистоннинг ташқи савдо айланмаси 2022 йилга нисбатан 23,9 фоизга ошиб, 62,5 млрд долларга етган. Шундан 24,4 млрд долларлик савдони экспорт, 38,1 млрд долларлик савдони эса импорт ташкил этган. Тегишли маълумотларни Статистика агентлиги маълум қилди.
2022 йилга таққослаганда, экспорт ҳажми 23,8 фоизга, импорт ҳажми 24,0 фоизга ошган.
Ташқи савдо манфий салдоси 2,7 млрд долларга ошиб, 13,7 млрд долларга етган.

