
Истанбулнинг ғарбий қисмида 3 қаватли турар жой биноси қулаб тушди. Бу ҳақда “Anadolu Ajansı” хабар берди.

Ҳодиса оқибатида бир киши ҳалок бўлиб, 8 киши жароҳатланган.
“Küçükçekmece“ туманида жойлашган бино якшанба куни маҳаллий вақт билан эрталаб соат 8:45 да қулаган. Ҳодиса сабаблари аниқ эмас, портлаш ёки сейсмик фаоллик белгилари кузатилмаган.

Воқеа жойига келган шаҳар мэри Довуд Гул вайроналар остидан 7 киши чиқариб олинганини айтди. Кейинроқ мэрия яна бир киши қутқарилгани, 1 кишининг жасади топилганини маълум қилди.

Бино бундан 36 йил аввал қурилган бўлиб, унинг юқори икки қаватида одамлар яшаган, пастки икки қаватида эса тадбиркорлар фаолият юритган.
Атроф-муҳит, урбанизация ва иқлим ўзгариши вазири Меҳмет Ўзҳасекининг сўзларига кўра, бино қуриб битказилгач, унинг устига бир қават қўшимча ноқонуний қурилиш қилинган. Бирламчи текширувларда бино архитектура-муҳандислик стандартларини бузган ҳолда қурилгани, қурилишда денгиз қуми ишлатилгани аниқланган.

